Onte, mercores, 15 de xullo, 2026
Ferrol con Palestina
Boas tardes!
De novo volvemos a estar na rúa, xunto a centos de miles de persoas en todo o mundo, para denunciar un xenocidio que non cesa, para denunciar o exterminio do Povo Palestino ante o silencio, a indiferenza, cando non complicidade, dos gobernos, sobre todo do mundo occidental. Gaza continua baixo a opresión
xenocida do estado ocupante israelí, a mesma sorte sofren o sur do Libano, Siria, Xerusalén oriental e Cisxordania. A agresión militar sionista e imperial, esténdese tamén a Irán e ao ao Iemen.
Segundo as últimas cifras publicadas polo Ministerio de Sanidade de Gaza, desde que entrou en vigor o cesamento do fogo o 11 de outubro de 2025, houbo 1.123 novos asasinatos, 3.599 persoas
feridas nos reiterados ataques e 800 corpos foron recuperados.
Desde o comezo do xenocidio israelí en outubro de 2023, as cifras de persoas asasinadas elévase a 73.247, e 173.707 feridas, mentres que miles máis seguen desaparecidas baixo os cascallos
ou en zonas inaccesíbeis para as equipas de rescate.
Non son cifras, son persoas, nenas e nenos, mulleres e homes,
anciáns que teñen nomes, familias enteiras que quedaron borradas. Son persoas das cales gardamos os seus nomes.
Hoxe mesmo o xornal “Crónicas de Palestina” publica un extenso reportaxe onde denuncia os novos asasinatos do exército ocupante de Israel que a continuación resumimos:
«Os ataques israelís mataron polo menos a 16 palestinos en Gaza durante as últimas 24 horas, entre eles nenos, nenas, mulleres,
policías e persoas que buscaban axuda humanitaria.
Unha familia de tres membros, incluída unha nena de seis anos, morreu nun ataque aéreo en Deir al-Balah.
Seis axentes de policía, incluído o xefe de policía de Jabaliya, o coronel Mohammed Marwan Salem, morreron nun ataque a un
posto de policía.
A primeira hora do día, Moataz Abu Shaar, de nove anos, foi asasinado despois de recibir un disparo no peito polas forzas
israelís que operaban ao noroeste de Rafah.
Os ataques, onde se utilizaron drons, tanques, mísiles, ... tiveron como obxectivo vivendas, instalacións policiais, zonas de
desprazamento e puntos de reunión de civís no norte, centro e sur de Gaza, deixando ducias máis de feridos.»
O xornal “Crónicas de Palestina” redacta cada día a crónica triste e desgarradora da realidade do seu pobo.
Pasaron máis de 1000 días desde a última declaración de cese do fogo, mais o xenocidio continúa en Gaza. O exterminio continua máis alá da liña amarela que reduciu Gaza a pouco máis do 40%
do seu territorio que tiña antes da invasión. Un territorio desbastado, queimado e contaminado polas bombas e as demolicións, onde viven amoreados case dous millóns de persoas, na súa maior parte entre ruínas, tendas de campaña e apaños de subsistencia, sen as infraestruturas e medios máis básicos para a vida en común. Dependendo das axudas exteriores que na súa maioría agardan nos pasos fronteirizos. Israel continúa bloqueando a axuda humanitaria e utilizando a fame como arma de guerra. O
pobo palestino está a morrer baixo as bombas, pero tamén de enfermidades, fame, sede e abandono. Na Cisxordania
intensifícanse, con máis crueza, a violencia extrema perpetrada por colonos armados, protexidos polo exército israelí, que destrúen colleitas, oliveiras, casas e mesmo aldeas, das que expulsan aos
seus moradores palestinos.
Hoxe queremos lembrar a Marwan Barghouti, dirixente palestino con case media vida de anos en prisión e aos máis de 9.600 presas e presos palestinos, incluíndo menores, reféns nos cárceres
de exterminio de Israel, onde se maltrata e tortura.
Traemos aquí as declaracións da advogada Fadwa Barghouti, compañeira de vida de Marwan Barghouti:
«Nun novo intento de atacar a Marwan, o Servizo Penitenciario Israelí emitiu un informe incitante nun momento no que a campaña internacional "Liberen a Marwan, Liberen a Palestina" continúa a
expandirse, atraendo figuras e líderes mundiais destacados e recibindo un apoio oficial e público significativo en todo o mundo.
Ao mesmo tempo, un dos gardas da prisión disparou unha bala de goma na perna de Marwan, causándolle hemorraxia e unha lesión dolorosa, outro episodio na serie continua de agresións contra el.
O que a ocupación non conseguiu comprender durante o último cuarto de século, e aínda non consegue comprender hoxe, é que Marwan nunca vacilou na súa convicción de que a liberdade é un
dereito fundamental e que a ocupación está destinada a rematar. Marwan rexeitou tanto a rendición como a desesperación, crendo que resistir á ocupación mentres se loita por unha paz xusta que a
poña fin é unha responsabilidade tanto nacional como moral. Cre na unidade do pobo palestino e da súa terra. A principal
preocupación de Marwan sempre foi salvar a cada crianza palestina do sufrimento da ocupación e da devastación da guerra,
o seu obxectivo, perdurable no tempo, é garantir unha vida de liberdade e dignidade para o seu Povo».
Lembramos tamén a Mohammed Al Wahidi, membro da Comisión de Axuda Exipcia en Gaza, responsábel das relacións públicas que organizou as retransmisións da Copa do Mundo para os residentes
do territorio. Un ataque israelí acabou coa súa vida, no barrio de Sabra da cidade de Gaza, xunto con outras dúas persoas. O
ataque ocorreu minutos antes do partido entre Exipto e Arxentina, mentres centos de habitantes de Gaza se reunían entre os
cascallos dos edificios destruídos para ver o partido.
Nunca cesou, sobre o movemento solidario con Palestina, o acoso e persecución policial e xudicial, inducida polo poder político e económico do lobby sionista mundial, e aceptada, cando non
executada, polos gobernos cómplices, principalmente do mundo occidental. Unha represión máis intensa e acelerada desde o
secuestro, en augas internacionais, de centos de activistas da Flotilla a finais de abril e logo a mediados de maio, con exposición pública dos tratos degradantes e torturas. Sen esquecernos do
acontecido en Libia, coa detención en Sirte, dos membros da Delegación Negociadora do Convoi Terrestre da Global Sumud,
agora felizmente en liberdade, despois dunha grande presión internacional.
A intensificación da represión é unha constante e sobre todo onde alcanzan os tentáculos do lobby sionista e o Mossad, así
Sempréganse mais a fondo, nos estados occidentais como Reino Unido, Alemaña, Francia, Estados Unidos e mesmo Portugal.
Non podemos pechar os ollos ante este fenómeno, mais relatar detalladamente os diferentes episodios da represión sobre o
movemento internacional de solidariedade con Palestina, desviaríanos do obxectivo principal de dito movemento do que
formamos parte e que nos obriga a pór os ollos en Palestina. Aínda así, temos que facer mención a algo que nos é máis próximo: a imputación do compañeiro Bruno Teixeiro, por denunciar o
xenocidio e ao estado que o exerce, á que teremos que facer fronte nos xulgados de Ferrol. Tampouco podemos deixar de mencionar o que aconteceu na pasada edición de “La Vuelta” ciclista. Na Galiza,
se lle fixo fronte nas diferentes etapas ate que se conseguiu parar, igual que noutros puntos do territorio do Estado. Na Galiza, polo de agora, só implicou sancións administrativas, aplicando a lei que
pretende sancionar o vandalismo no deporte, un deporte representado por institucións que permiten a participación de un estado xenocida, criminalizando a lexitima protesta. O sionismo
que impregna unha parte das institucións do estado, está pedindo oito anos de prisión para activistas que enfrontaron o xenocidio paralizando “La Vuelta Ciclista” en Valladolid.
Por último traemos a esta concentración o caso do filántropo estadounidense Fergie Cox Chambers que foi detido o pasado
venres 10 de xullo na illa de Ibiza, en cumprimento dunha orde da
Audiencia Nacional baseada nunha solicitude de extradición presentada polo Departamento de Xustiza dos Estados Unidos. O venres, o tribunal denegoulle a liberdade baixo fianza mentres se
tramita a súa extradición.
Para evitala, 13 organizacións políticas de esquerda enviaron unha carta ao goberno de Pedro Sánchez, solicitando a denegación da extradición. Nos Estados Unidos, Cox está acusado de branqueo
de capitais e de ter a intención de proporcionar apoio material e recursos a organizacións terroristas estranxeiras. Mais os asinantes sinalan que Chambers “é identificado publicamente como un doante e activista comprometido coa causa palestina e con proxectos humanitarios e sociais que apoian á poboación de Gaza”. Eis o seu crime que enfurece ao sionismo.
Tamén desde Ferrol con Palestina, manifestamos a nosa adhesión ao colectivo Sanidade Galega con Palestina que se uniu á iniciativa global pola liberación do Doutor Hussam Abu Safiya. Esta iniciativa acende unha candea para manter a luz sobre o que está a
suceder en Gaza, onde milleiros de prisioneiros políticos comoHussam continúan retidos polo exército israelí coa ameaza dunha condena a morte moi próxima. Hussam Abu Safiya é un pediatra
palestino e director do Hospital Kamal Adwan en Gaza e leva máis de 560 días detido pola forza ocupante, cun estado de saúde grave e con preocupantes declaracións que fan temer o peor.
Reclamamos a súa liberación inmediata, así como do resto das persoas vinculadas aos servizos sanitarios, obxectivos a abater por parte de Israel, xunto a xornalistas, e todos os presos e presas
políticas palestinas.
A Comisión Internacional Independente de Investigación da ONU sobre o Territorio Palestino Ocupado presentou un informe de case 100 páxinas sobre as violacións e os crimes cometidos contra as nenas e nenos palestinos entre o 7 de outubro de 2023 e o 31 de marzo de 2026. O pasado mes de Xuño a Comisión da ONU
concluíu que as autoridades e as forzas de seguridade israelís cometeron crimes de guerra e crimes contra a humanidade contra nenos palestinos. O seu informe documenta mortes, lesións, fame,
tortura e a destrución de escolas, hospitais e outras infraestruturas esenciais para as crianzas, e engade novos elementos á súa
conclusión anterior que afirmaba que o que está a suceder en Gaza é xenocidio.
A guerra esténdese e non queda outra que seguir na rúa mobilizando-se:
- Denunciando os ataques e asasinatos levados a cabo por Estados Unidos e Israel no suroeste asiático, desde Irán ata o
Líbano.
Denunciando unha orde internacional imperialista baseada na guerra, o saqueo de recursos e a imposición colonial, que pon en perigo a vida de millóns de persoas.
- Denunciando o armamentismo e o militarismo.
- Demandando políticas que busquen a descolonización e a coexistencia pacifica entre os pobos. Unha Paz duradeira e con
xustiza.
- Demandando que se lle faga cumprir a Israel todas as resolucións da ONU, asi como as sentenzas e resolucións da Corte
Internacional e Corte Penal Internacional respecto ao muro, á auga, aos asentamentos ilegais, a Xerusalén Leste e ao cese do Xenocidio.
- Demandando a ruptura do Acordo da Unión Europea con Israel.
- Demandando ao goberno do estado a ruptura de todo tipo de
relacións co estado xenocida de Israel.
- Demandando o fin do sistema de apartheid.
- Demandando a liberdade das presas e presos palestinos.
- Demandando un Non á impunidade e que todos os crimes de guerra e de lesa humanidade sexan xulgados!
- Demandando descolonización, xustiza e reparación.
Aquí seguimos, aqui seguiremos!
Do río ao mar, Palestina vencerá!
Viva Palestina Libre
15/07/2026
Viva Palestina libre Boycott, Divestment and Sanctions (BDS) Movement Boicot a Israel Global Sumud Flotilla Global Sumud Flotilla Freedom Flotilla Coalition Galiza por Palestina جليقية من أجل فلسطين BDS Galiza Global Movement To Gaza
#GazaGenocide
